অসংসদীয় শব্দৰ তালিকা
সংসদত ধৰ্ণা, বিক্ষোভত প্ৰতিবন্ধকতা
বিৰোধী দলৰ মৌখিক আক্ৰমণৰ পৰা চৰকাৰী পক্ষক ৰক্ষা কৰাৰ কৌশল হিচাপে অসংসদীয় শব্দৰ এখন তালিকা প্ৰকাশ কৰিছে অধ্যক্ষৰ কাৰ্য্যালয়ে।
মোডী চৰকাৰক সমালোচনা কৰাত সচৰাচৰ ব্যৱহাৰ হোৱা অসংখ্য ‘নিৰীহ’ শব্দকো তালিকাত অন্তৰ্ভুক্ত কৰা বুলি অভিযোগ উঠিছে । তালিকাত অন্তৰ্ভুক্ত কিছু শব্দ হৈছে, ‘লজ্জাজনক’, ‘নিৰ্য্যাতন’, ‘বিশ্বাসঘাটকতা ’, ‘নাটক’, ‘দুৰ্নীতিগ্ৰস্ত ’, ‘অযোগ্য’, ‘ভণ্ডামি’, ‘ঝুমলাবাজী’, ‘নৈৰাজ্যবাদী’, ‘শকুনি’, স্বৈৰাচাৰী’, ‘খালিস্তানী’, ‘বিনাশপুৰুষ’, ‘জয়চাঁদ’ ইত্যাদি।
শাসকীয় দলসমূহে প্ৰধান মন্ত্ৰী নৰেন্দ্ৰ মোডীক ‘বিকাশ পুৰুষ’ হিচাপে অভিহিত কৰি অহাৰ বিপৰীতে দেশে সন্মুখীন হোৱা অৰ্থনৈতিক বিপৰ্য্যয়ৰ পৰিপ্ৰেক্ষিতত বিৰোধীয়ে মোডীক ‘বিনাশ পুৰুষ’ বুলি অভিহিত কৰি আহিছে।
প্ৰধান মন্ত্ৰী আৰু দেশৰ শাসক পক্ষৰ সমালোচনাৰ চোক ভোটা কৰাৰ বাবেই যে এই পদক্ষেপ লোৱা হৈছে সেয়া স্পষ্ট । প্ৰশ্ন উঠিছে এনেধৰণে অসংসদীয় শব্দৰ তালিকা প্ৰস্তুত কৰাৰ অধিকাৰ সংসদৰ আছে নে নাই ?
লোক সভাৰ অধ্যক্ষ ওম বিৰলাই স্পষ্টীকৰণ দি জনাইছে কোনো শব্দকে নিষিদ্ধ কৰা হোৱা নাই। তালিকাত থকা শব্দসমূহ ব্যৱহাৰ কৰিলে ইয়াৰ বিৰুদ্ধে প্ৰতিপক্ষৰ সদস্যই আপত্তি দৰ্শালে শব্দসমূহ সংসদৰ কাৰ্য্যবিৱৰণীৰ পৰা বাদ দিয়া হ’ব।
স্পষ্টীকৰণ দি পাকেপ্ৰকাৰে এইবোৰৰ নিষিদ্ধকৰণ নিশ্চিত কৰিলে অধ্যক্ষ গৰাকীয়ে ।
সংসদ চলি থকা সময়ত সংসদ চৌহদৰ ভিতৰত ধৰ্ণা, বিক্ষোভ, অনশন ইত্যাদি সকলো ধৰণৰ প্ৰতিবাদী কাৰ্য্যসূচীত নিষেধাজ্ঞা জাৰি কৰি ৰাজ্য সভাৰ সচিবালয়ে নিৰ্দেশনা জাৰি কৰিছে।।
